കരുണയിൽ സമ്പന്നരാകുക.| ഇന്നത്തെ ചിന്ത | Sam Sasikumar

ആരെങ്കിലും നിങ്ങളോട് തെറ്റ്‌ ചെയ്തിട്ടുണ്ടോ?  അങ്ങനെയെങ്കിൽ, കരുണയിലും അനുകമ്പയിലും സമ്പന്നരായിരിക്കുക.  ദൈവം നിങ്ങളോട് ക്ഷമിച്ചതുപോലെ അവരോടും ക്ഷമിക്കുവാൻ ദൈവം  സംസാരിക്കുന്നു.

"കരുണാസമ്പന്നനായ ദൈവമോ നമ്മെ സ്നേഹിച്ച മഹാസ്നേഹം നിമിത്തം (എഫെ : 2:4 ). ഈ വാക്യത്തിന്റെ പാഠം മനുഷ്യരാശിയോടുള്ള ദൈവത്തിന്റെ അതിരുകളില്ലാത്ത സ്നേഹത്തെയും കാരുണ്യത്തെയും കുറിച്ചാണ്.  ദൈവത്തിന്റെ സ്നേഹം വ്യവസ്ഥാപിതമല്ലെന്നും മറിച്ച്  സമൃദ്ധമായ കരുണയിലും കൃപയിലും അധിഷ്ഠിതമാണെന്നും ഈ വാക്യം ഊന്നിപ്പറയുന്നു.  നമ്മുടെ ജീവിതത്തിലും സ്നേഹം, അനുകമ്പ, ക്ഷമ എന്നിവയുടെ പ്രാധാന്യം ഓർമ്മിപ്പിക്കുന്നതോടൊപ്പം തിരുവചനത്തിന്റെ  കേന്ദ്ര വിഷയമായ, നമ്മോടുള്ള ദൈവത്തിന്റെ സ്നേഹത്തിന്റെ ആഴം മനസ്സിലാക്കാനും വിലമതിക്കാനും ഇത് നമ്മെ പഠിപ്പിക്കുന്നു.

ആകയാൽ  " നിങ്ങൾ തമ്മിൽ ദയയും മനസ്സലിവുമുള്ളവരായി ദൈവം ക്രിസ്തുവിൽ നിങ്ങളോടു ക്ഷമിച്ചതുപോലെ അന്യോന്യം ക്ഷമിപ്പിൻ."( എഫെസ്യർ 4:32.) മറ്റുള്ളവരുമായുള്ള നമ്മുടെ ഇടപെടലുകളിൽ ദയ, അനുകമ്പ, ക്ഷമ എന്നിവയുടെ പ്രാധാന്യത്തെക്കുറിച്ച്  ഓരോ ദൈവവിശ്വാസിയും വ്യക്തമായി അറിഞ്ഞിരിക്കണം. യേശുക്രിസ്തുവിലൂടെ ദൈവം നമ്മൾക്ക് നൽകിയ ക്ഷമയെ അനുകരിക്കാനും പരസ്പരം അവരുടെ ബന്ധങ്ങളിൽ അത് പ്രയോഗിക്കാനും  വചനം പ്രോത്സാഹിപ്പിക്കുന്നു.

“നിങ്ങൾ മനുഷ്യരോട് അവരുടെ പിഴകളെ ക്ഷമിച്ചാൽ, സ്വർഗസ്ഥനായ നിങ്ങളുടെ പിതാവ് നിങ്ങളോടും ക്ഷമിക്കും.” “നിങ്ങൾ മനുഷ്യരോടു പിഴകളെ ക്ഷമിക്കാഞ്ഞാലോ നിങ്ങളുടെ പിതാവ് നിങ്ങളുടെ പിഴകളെയും ക്ഷമിക്കയില്ല.”(മത്തായി 6:14-15).

ലൂക്കോസ് 15 ആം അദ്ധ്യായത്തിൽ കാണുന്ന ധൂർത്തനായ പുത്രന്റെ ഉപമ പാപികളോടുള്ള ദൈവത്തിന്റെ കരുണയെ സൂചിപ്പിക്കുന്നു. പരീശന്മാരും ശാസ്ത്രിമാരും പാപികളോടുള്ള സ്നേഹരഹിതവും ക്ഷമിക്കാത്തതുമായ പെരുമാറ്റവുമായി ഇതിനെ താരതമ്യം ചെയ്യുക (ലൂക്ക. 15: 1-2).

പ്രിയമുള്ളവരേ , മറ്റുള്ളവരുടെ മുൻകാല പ്രവർത്തനങ്ങളെയോ അവരുടെ സാമൂഹിക നിലയെയോ അടിസ്ഥാനമാക്കി അവരെ വിധിക്കുകയോ ഒഴിവാക്കുകയോ ചെയ്യരുത്, മറിച്ച് എല്ലാവർക്കും സ്നേഹവും സ്വീകാര്യതയും ആത്മീയ മാർഗനിർദേശവും നൽകുന്നതിൽ യേശുവിന്റെ മാതൃക പിന്തുടരുക എന്ന ഓർമ്മപ്പെടുത്തലോടെ..

ക്രിസ്തുവിൽ നിങ്ങളുടെ സഹോദരൻ

സാം ശശികുമാർ.